‘மன்னராட்சி… பிறப்பால் ஒருவர் முதல்வர் ஆகக்கூடாது… வாரிசு அரசியல்…’ என தி.மு.க.வை கடுமையாக விமர்சித்த ஆதவ் அர்ஜுனா அ.தி.மு.க.வில் இணைவார் என்று எதிர்பார்க்கப்பட்ட நிலையில், தமிழக வெற்றிக் கழகத்தில் கடந்த சில தினங்களுக்கு முன்பு இணைந்தார்.
தி.மு.க.வை இப்படி கடுமையாக விமர்சித்த ஆதவ் அர்ஜுனா த.வெ.க.வில் இணைந்தது அவருடைய விருப்பம். ஆனால், அடுத்தாண்டு நடைபெறும் சட்டமன்றத் தேர்தலில் ஆதவ் அர்ஜுனாவால் த.வெ.க.வை ஆட்சிக்கட்டிலில் அமர வைக்க முயுமா? என்பது மில்லியன் டாலர் கேள்வி! வாய்ப்பு மிக மிகக் குறைவு!
அப்படியானால், தமிழக வெற்றிக் கழகம் அ.தி.மு.க.வுடன் கூட்டணி சேர்ந்தால்தான் தி.மு.க.வை மிக பலத்துடன் எதிர்த்து வெற்றி பெற வாய்ப்பு இருக்கிறது. ஆனால், அப்படி கூட்டணி அமையாவிட்டால் தமிழக வெற்றிக் கழகம் தலைமையில் ஒரு கூட்டணி அமைந்தால் தி.மு.க. எளிதாக வெற்றி பெறும் என்பது தமிழக அரசியல் களத்தில் தரவுகளை தன் கையில் வைத்திருக்கும் ஆதவ் அர்ஜுனாவிற்கு தெரியாதா என்ன?
எனவே, 2026 அ.தி.மு.க., த.வெ.க. கூட்டணி அமையுமா? என்பது பற்றி தமிழக அரசியல் பார்வையாளர்களிடம் பேசினோம்.
‘‘தமிழ்நாடு சட்டமன்ற தேர்தல் அடுத்த வருடம்தான் என்றாலும், அரசியல் களம் என்னவோ இப்போதே சூடுபிடித்துவிட்டது. பல்வேறு கட்சிகளும் கூட்டணி கணக்குகளை போட்டு வருகின்றன. அதில் பெரிய எதிர்பார்ப்பில் உள்ளது அதிமுக- & தவெக கூட்டணி அமையுமா என்பதுதான்.
அதிமுக கூட்டணி பேச்சுவார்த்தைகள் ஏற்கனவே தொடங்கி நடைபெற்று வருவதாக கூறப்படும் நிலையில், தவெக உடன் கூட்டணி வைப்பது குறித்து, எடப்பாடி பழனிசாமி தனது கட்சி நிர்வாகிகளிடம் ஆலோசனை நடத்தியிருக்கிறார். அப்போது, கூட்டணி அமைத்தாலும், முதல்வர் வேட்பாளர் இபிஎஸ் தான் என்பதில் அதிமுகவினர் தெளிவாக இருப்பார்கள்.முதல்வர் பதவியை எடப்பாடி பழனிசாமி விட்டுக்கொடுக்கமாட்டார்.
இதை உறுதி செய்வதுபோல், சமீபத்தில் பேசிய அதிமுக முன்னாள் அமைச்சர் ஆர்.பி. உதயகுமார், எடப்பாடி பழனிசாமியை முதல்வர் வேட்பாளராக முன்னிறுத்தியே 2026 தேர்தலை அதிமுக எதிர்கொள்ளும் என்றும், அதற்கு ஆதரவு தருபவர்களை சிவப்புக் கம்பளம் விரித்து வரவேற்க அதிமுகவினர் தயாராக உள்ளதாகவும் திட்டவட்டமாக தெரிவித்தார். அதைத் தொடர்ந்து, அதிமுக தரப்பிலிருந்து விஜய்க்கு 60 சீட்டுகளும், அமைச்சரவையில் இடமும் தருவதாக தகவல் அனுப்பப்பட்டுள்ளது. ஒருவேளை துணை முதலமைச்சர் பதவிக்கு விஜய் ஒத்துவந்தால், அதிமுக & -தவெக கூட்டணி அமையும் என தகவல்கள் வெளியாகியிருக்கிறது. ஆனால், தற்போது பேச்சுவார்த்தைகள் அடுத்த கட்டத்திற்கு செல்லவில்லை.
நடிகர் விஜய் சமீபத்தில் கட்சி தொடங்கியதே, 2026 சட்டமன்ற தேர்தலை குறி வைத்துதான். அவரது தமிழக வெற்றிக் கழகத்தின் முதல் மாநாட்டில் பேசும்போது கூட, கூட்டணி வைப்பத்தில் தனக்கு இருந்த விருப்பத்தையும், அப்படி கூட்டணி வருபவர்களுக்கு ஆட்சி அதிகாரத்தில் பங்கு எனவும் அதிரடியாக அறிவித்திருந்தார் விஜய். தற்போது தேர்தலுக்கான வேலைகளை தொடங்கிவிட்ட விஜய், தவெக கட்சியை பலப்படுத்தும் பணிகளை செய்துவருகிறார். ஆதவ் அர்ஜூனா, சிடிஆர் நிர்மல்குமார் உள்ளிட்டோரை கட்சியில் இழுத்ததன் மூலம், பல்வேறு கணக்குகளை விஜய் போட்டுவருவது தெளிவாக தெரிகிறது.
இப்படி பக்காவாக ஸ்கெட்ச் போட்டு, தங்களது தலைமையில் கூட்டணியை அமைப்பதற்கான வேலைகளை செய்துவரும் விஜய், கூட்டணிக்காக முதல்வர் வேட்பாளர் என்பதை விட்டுக்கொடுப்பாரா என்ற கேள்வி எழுந்துள்ளது. அதிமுகவினருடனான பேச்சுவார்த்தை தொங்கலில் இருப்பது கூட இதனால்தான். துணை முதலமைச்சர் என்பதெல்லாம் சரிப்பட்டு வராது என விஜய் நினைப்பதாக தெரிகிறது.
இப்படி, இரண்டு கட்சிகளுமே கறாராக இருப்பதால், அதிமுக & -தவெக கூட்டணி அமைவதில் சிக்கல் ஏற்பட்டுள்ளது. கட்சியின் எதிர்காலத்திற்காக விஜய் விட்டுக்கொடுப்பாரா அல்லது தொடர் தோல்விகளை சந்தித்து, வாழ்வா சாவா என்று இருக்கும் அதிமுகவை மீட்க, இபிஎஸ் இறங்கி வருவாரா? என்ற கேள்வி எழுந்திருக்கிறது. தவிர, 50 ஆண்டுகளுக்கு மேலான கட்சியான அ.தி.மு.க.தான் முதல்வர் பதவியை வகிக்கும். கடந்தாண்டு கட்சியை ஆரம்பித்த விஜய் முதல்வர் பதவியை எதிர்பார்த்து அ.தி.மு.க. கூட்டணியில் இணையாவிட்டால், மீண்டும் தி.மு.க. ஆட்சியை பிடிக்கும் என்பது எல்லோருக்கு தெரிந்ததுதான்’’ என்றனர்.
2026ல் மீண்டும் தி.மு.க. ஆட்சி அமைவதும், அமையாததும் விஜய் மற்றும் எடப்பாடி பழனிசாமி ஆகியோர் கைகளில்தான் இருக்கிறது என்கிறார்கள் அரசியல் பார்வையாளர்கள்!