முதல்வர் மு.க.ஸ்டாலினும், பா.ம.க. நிறுவனர் டாக்டர் ராமதாஸும் விரைவில் ஒரே மேடையில் தோன்றப் போவதாக தகவல்கள் வெளியாகியிருக்கிறது. இது தி.மு.க. & பா.ம.க. கூட்டணிக்கு அச்சாரமாக அமையுமா? என கேள்வி எழுந்திருக்கிறது.
விழுப்புரத்தில் வரும் 29ம் தேதி, முதல்வர் ஸ்டாலின் பங்கேற்கும் , 21 சமூகநீதி போராளிகள் மணிமண்டப திறப்பு விழாவுக்கு தமிழக அரசு சார்பில் பாமக நிறுவனர் ராமதாஸ் மற்றும் சமூகநீதி போராளிகள் குடும்பங்களுக்கு அழைப்பு விடுக்கப்படும், என்று அமைச்சர் பொன்முடி கூறியுள்ளார்.
விழுப்புரம் வழுதரெட்டி பகுதியில் அமைக்கப்பட்டுள்ள 21 சமூகநீதிப் போராளிகள் மணிமண்டபத்தையும், முன்னாள் அமைச்சர் ஏ.கோவிந்தசாமியின் நினைவு அரங்கத்தையும்,வரும் 29-ம் தேதி முதல்வர் ஸ்டாலின் திறந்துவைக்கிறார். மேலும் அனறைய தினம், அரசு நலத்திட்ட உதவிகள் வழங்கும் விழாவும் நடைபெற உள்ளது. இதற்கான ஏற்பாடுகள் நடைபெற்று வருகிறது. இதையொட்டி, இன்று (நவ.23) விழுப்புரம் தெற்கு திமுக மாவட்ட செயல்வீரர்கள் கூட்டம் நடைபெற்றது.
இதில் கலந்துகொண்ட வனத்துறை அமைச்சர் பொன்முடி, “வரும், நவ.29ம் தேதி, விழுப்புரத்தில் நடைபெறும் , ஏ.கோவிந்தசாமி நினைவரங்கம் மற்றும் 21 சமூகநீதி போராளிகள் மணிமண்டப திறப்பு விழாவில் தமிழக முதல்வர் பங்கேற்கிறார். இந்த நிகழ்ச்சியில் பங்கேற்க, தமிழக அரசு சார்பில் பாமக நிறுவனர் ராமதாஸ், மற்றும் 21 சமூகநீதி போராளிகள் குடும்பத்துக்கு அழைப்பு விடுக்கப்படும்.” என்றார்.
முதல்வர் மு.க.ஸ்டாலின் பங்கேற்கும் மேடையில் டாக்டர் ராமதாஸ் பங்கேற்பாரா என விவாதங்கள் எழுந்த நிலையில், ‘நடிகர் விஜய், அ.தி.மு.க.வை வைத்து திருமாவளவன் போக்கு காட்டிக் கொண்டிருக்கும் போது, முதல்வருடன் டாக்டர் ராமதாஸை ஒரே மேடையில் அமர வைத்து திருமாவளவனுக்கு ‘செக்’ வைக்க தி.மு.க.வின் முன்னணி நிர்வாகிகள் முயற்சித்து வருவதாகவும் தகவல்கள் வெளியாகியிருக்கிறது.
சமீபத்தில் அடுத்து ஆளுப்போகும் கட்சியல்தான் பா.ம.க. இடம் பெற்றிருக்கு என அன்புமணி ராமதாஸ் கூறியிருப்பது குறிப்பிடத்தக்கது.