இன்னும் ஓரிரு தினங்களில் ஆயுதபூஜை, சரஸ்வதி பூஜை வரவிருக்கிறது. அடுத்தது தீபாவளி பண்டிகையும் வருகிறது. வழக்கமாக பண்டிகை காலங்களில் மக்கள் மகிழ்ச்சியுடன் இருப்பார். ஆனால், விலைவாசி உச்சத்தில் இருப்பதால் பொதுமக்கள் கண்ணத்தில் கைவைத்து உட்கார்ந்திருக்கிறார்கள். தவிர, த.வெ.க. ஆட்சியில் விலைவாசி விண்ணைத் தொட்டுவிட்டது என்ற குற்றச்சாட்டையும் வைக்கிறார்கள்.
நடிகர் விஜய் தலைமையில் தமிழக வெற்றிக் கழகத்தின் ஆட்சி அமைந்த பிறகு, நிர்வாகக் குளறுபடிகளாலும் சந்தைக் கண்காணிப்பு இல்லாததாலும் இந்த நிலை ஏற்பட்டுள்ளதாகச் சாமானிய மக்கள் வெளிப்படையாகவே அதிருப்தியை வெளிப்படுத்தி வருகின்றனர்.
தீபாவளி என்றாலே பலகாரங்களும் புத்தாடைகளும்தான் நினைவுக்கு வரும். ஆனால், பலகாரம் செய்யத் தேவையான சமையல் எண்ணெய், நெய், மைதா, கடலை மாவு, சீனி, பருப்பு வகைகள் என அனைத்தின் விலையும் கடந்த சில வாரங்களில் சரமாரியாக உயர்ந்துள்ளன. ஒரு கிலோ சமையல் எண்ணெயின் விலை முன்பை விடக் கடுமையாக உயர்ந்து விற்கப்படுகிறது. அதேபோல், அன்றாடத் தேவைகளான தக்காளி, வெங்காயம், பச்சை மிளகாய், இஞ்சி, பூண்டு உள்ளிட்ட காய்கறிகளின் விலையும் சாமானிய மக்களின் கையை விட்டுப் போய்விட்டது.
‘‘பண்டிகைக்குப் பலகாரம் சுட்டு அக்கம்பக்கத்தினருக்குக் கொடுப்பது எங்கள் வழக்கம். ஆனால், இப்போது இருக்கும் மளிகைப் பொருட்களின் விலையைப் பார்த்தால், வீட்டுக்கு மட்டும் கொஞ்சமாகச் செய்து திருப்திப்பட்டுக்கொள்ள வேண்டிய அவல நிலை வந்துவிட்டது’’ என்று இல்லத்தரசிகள் வேதனையுடன் தெரிவிக்கின்றனர்.
குழந்தைகளுக்குப் புத்தாடை எடுப்பதும், பட்டாசு வாங்குவதும் தீபாவளியின் முக்கிய அங்கம். ஆனால், துணிக்கடைகளிலும் பட்டாசுக் கடைகளிலும் ஜிஎஸ்டி மற்றும் தயாரிப்புச் செலவு உயர்வைக் காரணம் காட்டி இரட்டிப்பு விலைக்குப் பொருட்கள் விற்கப்படுகின்றன. புதிய அரசின் வரிவிதிப்புக் கொள்கைகள் மற்றும் சந்தைக் கட்டுப்பாடற்ற நிலைமை காரணமாக சில்லறை வர்த்தகம் பெரும் பாதிப்பைச் சந்தித்துள்ளது.
குழந்தைகளின் ஆசையை நிறைவேற்றக் கூடப் பெற்றோர்கள் கடன் வாங்க வேண்டிய நிர்ப்பந்தத்திற்குத் தள்ளப்பட்டுள்ளனர். ‘‘ஒவ்வொரு ஆண்டும் தீபாவளி போனஸ் பணத்தில் துணி, பட்டாசு எடுத்து மீதமுள்ள பணத்தை மிச்சம் பிடிப்போம். ஆனால் இந்த முறை போனஸ் பணம் மளிகை சாமான்களுக்கே போதாது போலிருக்கிறது’’ என நடுத்தரக் குடும்பத்தினர் குமுறுகின்றனர்.
பண்டிகைக் காலங்களில் மக்கள் பாதிக்கப்படாமல் இருக்கச் சிறப்புச் சந்தைகளை அமைப்பது, அத்தியாவசியப் பொருட்களின் விலையைக் கட்டுப்படுத்த நேரடிக் கொள்முதல் செய்வது, பதுக்கல்காரர்கள் மீது கடுமையான நடவடிக்கை எடுப்பது போன்ற பணிகளை அரசாங்கம் முன்னெடுக்கும்.
ஆனால், தவெக அரசு இந்த விவகாரத்தில் முற்றிலும் மெத்தனப் போக்கைக் கடைப்பிடிப்பதாகப் பொதுமக்கள் குற்றம் சாட்டுகின்றனர். விலைக் கட்டுப்பாட்டு வாரியம் சரிவர இயங்கவில்லை என்றும், கூட்டுறவு அங்காடிகள் மூலமாக மக்களுக்குக் குறைந்த விலையில் மளிகைப் பொருட்கள் சென்றடைவதை அரசு உறுதி செய்யவில்லை என்றும் வியாபாரிகளும் கூறுகின்றனர். சந்தையில் தங்குதடையின்றிப் பொருட்கள் கிடைப்பதை ஒழுங்குபடுத்தாததால், இடைத்தரகர்களும் பதுக்கல்காரர்களும் விலையைத் தாறுமாறாக உயர்த்தி லாபம் சம்பாதித்து வருகின்றனர்.
மாற்றம் வேண்டும் என வாக்களித்த மக்கள் விலை ஏ(மா)ற்றத்தால் விழிபிதுங்கி நிற்கின்றனர். முதல்வரோ ஆந்திரா, கேரளா, கர்நாடகா என சுற்றி வருகிறாரே தவிர, விலைவாசியை கட்டுப்படுத்த அமைச்சரவையை கூட்டி நடவடிக்கை எடுத்ததாக தெரியவில்லை!