தமிழக அரசின் நெடுஞ்சாலைத் துறை வெளியிட்ட சர்ச்சைக்குரிய 21 டெண்டர்கள் அதிரடியாக ரத்து செய்யப்பட்டுள்ளன.
மாநில நெடுஞ்சாலைத் துறையில் முறைகேடுகளுக்கு வழிவகுக்கும் வகையில் கோரப்பட்டிருந்த 21 வரம்பிற்குட்பட்ட ((Limited) டெண்டர்களைத் தமிழ்நாடு அரசு உடனடியாக ரத்து செய்து உத்தரவிட்டுள்ளது. ஊழலுக்கு எதிராகத் தொடர்ந்து குரல் கொடுத்து வரும் ‘ அறப்போர் இயக்கம் ‘ எழுப்பிய உடனடிப் புகாரைத் தொடர்ந்து அரசு இந்த நடவடிக்கையை மேற்கொண்டுள்ளது.
மாநில நெடுஞ்சாலைத் துறையில் தொழில்நுட்ப உதவியாளர்களைப் பணியமர்த்துவதற்காக 21 சிறிய அளவிலான டெண்டர்கள் சமீபத்தில் அறிவிக்கப்பட்டன. ஆனால், இவை பொதுமக்கள் மற்றும் அனைத்து ஒப்பந்ததாரர்களும் பங்கேற்கும் வகையில் வெளிப்படையான இணையதள ஓபன் டெண்டர்களாக (Open Tenders) அறிவிக்கப்படாமல், குறிப்பிட்ட சிலரை மட்டும் இலக்காகக் கொண்டு வரம்பிற்குட்பட்ட (Limited) டெண்டர்களாக வெளியிடப்பட்டிருந்தன.
இது குறித்து அறப்போர் இயக்கம் உடனடிப் புகார் ஒன்றை எழுப்பியது. “அனைவருக்குமான ஓபன் டெண்டர்களாக வெளியிடாமல், ஏன் குறிப்பிட்ட சில ஒப்பந்ததாரர்களுக்கு மட்டும் பயன்படும் வகையில் லிமிடெட் டெண்டர்களாக வெளியிடப்பட்டது?” என்று கேள்வி எழுப்பியது. மேலும், தொழில்நுட்ப உதவியாளர்களை நியமிப்பதற்காகக் கோரப்பட்ட இந்த டெண்டர்கள் துறைக்கு உண்மையிலேயே அவசியமானவைதானா என்பதை அரசு முதலில் விரிவாக ஆராய வேண்டும் என்றும் வலியுறுத்தியது.
அறப்போர் இயக்கம் எழுப்பிய புகாரின் தீவிரத்தையும் அதில் உள்ள நியாயத்தையும் உணர்ந்த தமிழ்நாடு அரசு, உடனடியாகச் செயல்பட்டு அந்த 21 லிமிடெட் டெண்டர்களையும் ரத்து செய்து அதிரடி உத்தரவைப் பிறப்பித்துள்ளது.
அரசின் இந்த நேர்மறையான மற்றும் விரைவான முடிவை வரவேற்றுள்ள அறப்போர் இயக்கம், தனது சமூக வலைத்தளப் பதிவில் தமிழ்நாடு அரசுக்குத் தனது நன்றியைத் தெரிவித்துக் கொண்டுள்ளது. மக்கள் பணமும் அரசு நிர்வாகத்தின் வெளிப்படைத்தன்மையும் பாதுகாக்கப்பட இதுபோன்ற உடனடி நடவடிக்கைகள் மிகவும் அவசியமானவை என்பதை இந்த முடிவு சுட்டிக்காட்டுகிறது.