வருகின்ற நாடாளுமன்றக் கூட்டத்தொடரில், தமிழ்நாட்டு மக்களின் பிரதிநிதிகளிடம் ஒன்றிய பாஜக அரசு பதில் சொல்லியே ஆகவேண்டும். மிகப்பெரிய ஜனநாயக நாடு என்று பெருமையாகச் சொல்லிக்கொண்டே, தமிழ்நாட்டு மக்களின் குரலை ஒன்றிய பா.ஜ.க. அரசு புறக்கணிப்பது சரியா என தமிழக முதல்வர் ஸ்டாலின் கேள்வியெழுப்பியுள்ளார்.
திமுக நாடாளுமன்ற உறுப்பினர்கள் கூட்டத்தில் மாநில உரிமைகளை மதிக்காமல் இருப்பது, ரயில் திட்டங்களில் தமிழகத்தை புறக்கணிப்பது உள்ளிட்ட 12 தீர்மானங்கள் மத்திய அரசுக்கு எதிராக நிறைவேற்றப்பட்டது.
சென்னையில் முதல்வர் ஸ்டாலின் தலைமையில் இன்று (நவ.29) திமுக எம்பிக்கள் கூட்டம் நடைபெற்றது. இக்கூட்டத்தில் 12 தீர்மானங்கள் நிறைவேற்றப்பட்டன. அதன் விபரம் பின்வருமாறு:
தீர்மானம் 1: மாநில உரிமைகளை மதிக்காமல் அனைத்து வகையிலும் தமிழகத்தை வஞ்சித்து வரும் மத்திய பாஜக அரசுக்கு கண்டனம் .
தீர்மானம் 2: “புதிய ரயில் திட்டங்களும் இல்லை. பத்து ஆண்டுகளுக்கு முன்பே அறிவிக்கப்பட்ட பல்வேறு முக்கியமான ரயில் திட்டங்களும் செயல்படுத்தப்படுவதில்லை” என்று தமிழ்நாட்டை ஒட்டுமொத்தமாகப் புறக்கணித்து வருகிறது ஒன்றிய பாஜக அரசுக்கு கண்டனம் தெரிவித்து தீர்மானம் நிறைவேற்றப்பட்டது.
தீர்மானம் 3: பிரதமர் மோடி நேரில் தலையிட்டு கோவை, மதுரை மெட்ரோ ரயில் திட்டங்களை அனுமதிக்க வேண்டும் என வலியுறுத்தி தீர்மானம் நிறைவேற்றப்பட்டது.
தீர்மானம் 4: கோவை, மதுரை விமான நிலைய விரிவாக்கம், மதுரை பன்னாட்டு விமான நிலையத் திட்டம் ஆகியவற்றிற்கு அனுமதி தர வலியுறுத்தி தீர்மானம் நிறைவேற்றப்பட்டது.
தீர்மானம் 5 : கருணாநிதி பல்கலைக்கழகச் சட்டமுன்வடிவுக்கு ஜனாதிபதி ஒப்புதல் அளிக்கவும், ஆளுநருக்கு கால நிர்ணயம் செய்யவும் பார்லியில் குரல் எழுப்ப வலியுறுத்தி தீர்மானம் நிறைவேற்றப்பட்டது.
தீர்மானம் 6 : செறிவூட்டப்பட்ட அரிசி வழங்கும் திட்டத்தில் விவசாயிகளைப் பாதுகாத்திட மத்திய அரசுக்கு முதல்வர் ஸ்டாலின் வைத்த கோரிக்கையை உடனடியாக ஏற்றுக்கொள்ள வலியுறுத்தி தீர்மானம் நிறைவேற்றப்பட்டது.
தீர்மானம் 7: நெல் கொள்முதல் ஈரப்பதத்தை 17 சதவீதத்தில் இருந்து 22 சதவீதமாக உயர்த்த வலியுறுத்தி தீர்மானம் நிறைவேற்றப்பட்டது.
தீர்மானம் 8 : 3548.22 கோடி ரூபாய் சமக்ர சிக்ஷா கல்வி திட்டத்தின் நிதியை விடுவிக்க வேண்டும் என வலியுறுத்தி தீர்மானம் நிறைவேற்றப்பட்டது.
தீர்மானம் 9 : மத்திய அரசின் நான்கு தொழிலாளர் சட்டத் தொகுப்புகளால் தொழிலாளர்களின் உரிமை பாதிக்கப்படக்கூடாது என வலியுறுத்தி தீர்மானம் நிறைவேற்றப்பட்டது.
தீர்மானம் 10: இந்திய மீனவர்களின் பாரம்பரிய மீன்பிடி உரிமைகளைப் பாதுகாப்பதற்கும், கைது செய்யப்பட்ட மீனவர்கள் மற்றும் படகுகளை விரைவாக விடுவிப்பதற்கும் நிரந்தரத் தீர்வு அவசியம் என வலியுறுத்தி தீர்மானம் நிறைவேற்றப்பட்டது.
தீர்மானம் 11: பணி நியமனம் பெற்று தற்போது ஆசிரியர்களாக பணியாற்றுபவர்களின் பணி மற்றும் பதவி உயர்வினை மத்திய அரசு பாதுகாக்க வலியுறுத்தி தீர்மானம் நிறைவேற்றப்பட்டது.
தீர்மானம் 12 :கிராமப்புற ஏழை மக்களுக்கு முக்கியமான திட்டமாக இருக்கும் மகாத்மா காந்தி ஊரக வேலைவாய்ப்பு திட்ட நிதியை உடனடியாக தமிழகத்திற்கு வழங்க வலியுறுத்தி தீர்மானம் நிறைவேற்றப்பட்டது.