தமிழக வெற்றிக் கழகத்தின் (தவெக) நிர்வாகக் குழு தலைமை ஒருங்கிணைப்பாளரும் முன்னாள் அமைச்சருமான கே.ஏ. செங்கோட்டையன் இன்று செய்தியாளர்களிடம் பேசுகையில், “2026 சட்டமன்றத் தேர்தலில் மக்களின் மாபெரும் ஆதரவுடன் தவெக தலைவர் விஜய் ஆட்சிப் பீடத்தில் அமர்வார்” என்று திட்டவட்டமாக அறிவித்தார்.
“தமிழ்நாட்டு மக்களிடம் இப்போது ஒரு புதிய எண்ணம் எழுந்துள்ளது – புதியவர்கள் ஆள வேண்டும், தூய்மையான ஆட்சி வேண்டும் என்ற எண்ணம். அதற்கு இளவல் விஜய் தலைமையிலான தவெகவே பதிலாக இருக்கும்” என்று அவர் நம்பிக்கை தெரிவித்தார். தவெகவில் இணைந்து ஒரு நாளே ஆன நிலையில், செங்கோட்டையன் விஜய்யை புகழ்ந்து பேசினார்.
“விஜய் ஒரு மாபெரும் இயக்கத்தை உருவாக்கியுள்ளார். மக்கள் தானாக முன்வந்து ஆதரவு தருகிறார்கள். இது 2026-ல் புரட்சியாக வெடிக்கும்” என்று கூறினார். அதிமுகவில் 50 ஆண்டுகளுக்கும் மேல் பயணித்த அனுபவத்தை தவெகவுக்கு பயன்படுத்துவேன் என்றும் உறுதியளித்தார். அதிமுகவில் இருந்து விரைவில் வேறு தலைவர்கள் தவெகவில் இணைய வாய்ப்பு உள்ளதா என்ற கேள்விக்கு, “யார் யார் இணைவார்கள் என்பதை இப்போது சொல்ல முடியாது. சொன்னால் தேவையில்லாத பிரச்சினைகள் வரும். ஆனால் மக்கள் மனதில் மாற்றம் ஏற்பட்டிருக்கிறது. தானாகவே பலர் வருவார்கள்” என்று புன்னகையுடன் தவிர்த்தார் செங்கோட்டையன்.
மேலும், தவெகவின் வளர்ச்சி குறித்து பேசிய அவர், “கொங்கு மண்டலத்தில் மட்டுமல்ல, தமிழகம் முழுவதும் தவெகவுக்கு அமோக ஆதரவு கிடைத்து வருகிறது. 2026-ல் வெற்றி நிச்சயம். நல்லதே நடக்கும்” என்று முடித்துக் கொண்டார். செங்கோட்டையனின் இந்த உறுதியான பேச்சு, தவெகவினரிடையே பெரும் உற்சாகத்தை ஏற்படுத்தியுள்ளது.