முன்னாள் அமைச்சரும், அ.தி.மு.க.வின் சீனியருமான கே.ஏ.செங்கோட்டையன் இன்று எம்.எல்.ஏ. பதவியை ராஜினாமா செய்த நிலையில், நாளை த.வெ.க.வில் இணைய இருப்பதாக உறுதியான தகவல்கள் வெளியாகியிருக்கிறது.
தமிழக அரசியலில் பரபரப்பை ஏற்படுத்தியுள்ள வகையில், மூத்த அதிமுக தலைவரும், முன்னாள் அமைச்சருமான கே.ஏ. செங்கோட்டையன் இன்று தனது சட்டமன்ற உறுப்பினர் (எம்.எல்.ஏ) பதவியை ராஜினாமா செய்தார். கோபிசெட்டிபாளையம் தொகுதி உறுப்பினராக இருந்த அவர், சென்னை தலைமைச் செயலகத்தில் தமிழக சட்டப்பேரவை சபாநாயகர் மு. அப்பாவுவை நேரில் சந்தித்து, ராஜினாமா கடிதத்தை நேரடியாக வழங்கினார்.
இந்த நடவடிக்கை, அதிமுகவிலிருந்து அவர் சமீபத்தில் நீக்கப்பட்டதைத் தொடர்ந்து வந்துள்ளது குறிப்பிடத்தக்கது.செங்கோட்டையன் அதிமுகவில் இருந்து நீக்கப்பட்டது கடந்த சில தினங்களுக்கு முன்பே நிகழ்ந்தது. கட்சித் தலைமைக்கு எதிராகவும், கட்சி ஒழுங்கீன நடவடிக்கையிலும் ஈடுபட்டதாகக் கூறி, அதிமுக பொதுச்செயலாளர் எடப்பாடி கே. பழனிசாமி அவரை கட்சியிலிருந்து நீக்கி உத்தரவிட்டார். இதனால் கட்சியின் அடிப்படை உறுப்பினர் உரிமை கூட பறிபோன நிலையில், செங்கோட்டையன் தற்போது எம்.எல்.ஏ பதவியையும் அவரே ராஜினாமா செய்துள்ளார்.
ராஜினாமா செய்துவிட்டு வெளியே வந்த செங்கோட்டையனிடம் செய்தியாளர்கள், “விஜய்யின் தமிழக வெற்றிக் கழகத்தில் (த.வெ.க) இணையப் போகிறீர்களா?” என்று கேள்வி எழுப்பினர். அதற்கு புன்சிரிப்புடன் பதிலளித்த செங்கோட்டையன், “இன்று ஒரு நாள் மட்டும் பொறுத்திருங்கள்!” என்று சூசகமாகவே கூறினார். இந்த ஒரு வார்த்தை பதில் தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.
தவெக தலைவர் விஜய் ஏற்கனவே செங்கோட்டையனை வரவேற்பதாகவும், அவர் தவெகவில் இணைவது உறுதி என்றும் கட்சி வட்டாரத்தில் பேச்சு அடிபட்டு வந்தது குறிப்பிடத் தக்கது.
கே.ஏ.செங்கோட்டையனின் அடுத்த கட்ட நகர்வுகள் குறித்து அவருக்கு நெருக்கமானவர்களிடம் பேசினோம். ‘‘சார், அ.தி.மு.க.வின் அடிப்படை உறுப்பினர் பதவியில் இருந்து செங்கோட்டையனை எடப்பாடி பழனிசாமி நீக்கினார். இது அவரது 50 ஆண்டுகால அரசியல் வாழ்க்கையையே கேள்விக்குறியாக்கியிருந்தது. இந்தநிலையில்தான் செங்கோட்டையன் த.வெ.க.வில் இணைவதாக தகவல்கள் வெளியானது.
இந்த தகவல்கள் வெளியான பின் நேற்று (25ம் தேதி) கோவையில் இருந்த முதல்வர் செங்கோட்டையனிடம் பேசியிருக்கிறார். அதற்கு முதல்வரிடம், ‘நான் நாளை எம்.எல்.ஏ. பதவியை ராஜினாமா செய்கிறேன்’ என்று மட்டும் கூறியிருக்கிறார். அதற்கு, ‘தி.மு.க. உங்களது தாய்க்கழகம்தான். நீங்கள் வரவேண்டிய இடம் தி.மு.க.தான்… உங்களுக்கு உரிய முக்கியத்துவம் கொடுக்கப்படும்’ என முதல்வர் ஸ்டாலின் நேரடியாக செங்கோட்டையனிடம் பேசியிருக்கிறார். ஆனாலும், செங்கோட்டையன் தி.மு.க.வில் இணைய விரும்பவில்லை.
இதற்கிடையே முன்னாள் அமைச்சர்கள் முத்துசாமி, தோப்பு வெங்கடாச்சலம் ஆகியோரும் செங்கோட்டையனிடம் பேசியிருக்கிறார்கள். அதற்கும் செங்கோட்¬டையன் பிடி கொடுக்கவில்லை. இதற்கிடையே, தனது பதவியை ராஜினாமா தலைமைச் செயலகம் வந்தபோது தலைமச் செயலகத்தில் அமைச்சர் சேகர் பாபு செங்கோட்டையனிடம் பேசியிருக்கிறார்.
‘தி.மு.க.வில் உங்களுக்கு உரிய முக்கியத்துவம் கொடுக்கப்படும்… நீங்கள் வரவேண்டிய இடம் அறிவாலயம்… உங்களை அழைத்து வரச் சொல்லி தலைவர் என்னிடம் பேசினார்’ என்று அமைச்சர் சேகர் பாபு சொல்லியும் செங்கோட்டையன் பிடிகொடுக்கவில்லை. காரணம், ஏற்கனவே செங்கோட்டையனை தி.மு.க.வின் ‘பிடீம்’ என்று கூறிவந்த நிலையில், அவர் தி.மு.க.வில் இணைந்தால் அது ஊர்ஜிதமாகிவிடும் என்பதால்தான், செங்கோட்டையன் எடுத்த முடிவில் உறுதியாக இருக்கிறார். நாளை த.வெ.க.வில் இணைகிறார்’’ என்றனர்.
‘‘ முதல்வர் ஸ்டாலினே நேரடியாக செங்கோட்டையனிடம் பேசிய பிறகும் செங்கோட்டையன் தனது முடிவில் உறுதியாக இருப்பதன் பின்னணியில் ‘மேலிட’ அஜெண்டா இருக்கிறது. இன்னும் ஓரிரு மாதத்தில் ‘மேலிடத்தின்’ ஆட்டம் ஆரம்பமாகும்! என்கிறார்கள் ‘மேலிட’ வட்டாரத்தில்!